Віцебскі цыкл "Urbi et Orbi" распачынае Андрэй Хадановіч

Сучасная беларуская літаратура - яшчэ міф ці ўжо рэальнасць? Хто зараз стварае будучыню айчыннага літаратурнага мастацтва: вядомыя блогеры ці прадстаўнікі андэграўнда? Што турбуе сучасных аўтараў і як яны перажываюць наступствы постмадэрнізму? Ці ёсць яшчэ наогул беларуская паэзія?!

У лістападзе Лятучы ўніверсітэт пачынае новы сезон публічных прамоў "Urbi et Orbi" у Віцебску. З лекцыяй "Беларуская літаратура на пачатку XXI стагоддзя" перад віцебскімі слухачамі выступіць паэт, перакладчык Андрэй Хадановіч.

У разважаннях пра актуальны стан беларускай літаратуры лектар плануе спыніцца на больш дэтальным аналізе пяці тэматычных блокаў:

• Сучасная беларуская літаратура: афіцыйная і незалежная версіі;
• Беларуская літаратура ў Інтэрнэце: новыя магчымасці;
• Мастацкі пераклад і яго месца ў сучаснай беларускай культуры;
• Конкурсы і ўзнагароды як "каталізатар" літаратурнага працэсу;
• Міжнародныя фестывалі і паэтычныя слэмы ў Беларусі.

Публічная лекцыя Андрэя Хадановіча адбудзецца 9 лістапада 2013 года ў Віцебску па адрасе: вул. Белабародава, 5, вялікая зала Музею "ВЦСМ". Пачатак у 15.00. Уваход вольны!

Нумар тэлефона для даведак: (+375 29) 2423722 (Яўген).

Лекцыя праводзіцца пры падтрымцы Міжнароднага кансорцыюма "ЕўраБеларусь".

Пра лектара:

Паэт, перакладчык, арганізатар літаратурных імпрэзаў Андрэй Хадановіч нарадзіўся ў 1973 годзе ў горадзе Мінску. Скончыў філалагічны факультэт БДУ(1995) і аспірантуру БДУ па спецыяльнасці замежная літаратура (1999). Цяпер выкладае гісторыю французкай літаратуры на філалагічным факультэце БДУ, а таксама вядзе заняткі "Перакладчыцкай майстэрні" пры Беларускім калегіюме. Перакладае з англійскай, французскай, польскай, рускай і ўкраінскай моваў. Аўтар кніг "Старыя вершы", "Лісты з-пад коўдры", "Землякі, альбо Беларускія лімэрыкі", "Сто лі100ў на tut.by", "Бэрлібры", "Несымэтрычныя сны".

Вершы Андрэя Хадановіча перакладаліся на два дзясяткі моваў, публікаваліся асобнымі кнігамі ў Польшчы, Украіне, Швецыі. У 2008 годзе паэт атрымаў прыз "Крышталь Віленіцы" на Міжнародным літаратурным фестывалі ў Славеніі, а таксама прэмію "Залаты апостраф" часопіса "Дзеяслоў". Пачынаючы са снежня 2008 года і па сённяшні час Андрэй Хадановіч з’яўляецца старшынёй Беларускага ПЭН-цэнтра.