"Беларускі калегіюм" абвяшчае новы набор на навучаннне

Навучанне ў "Беларускім калегіюме" - бясплатнае.

Пачатак заняткаў з 28 кастрычніка 2013 года.

"Беларускі калегіюм" прапануе дадатковае навучанне па спецыялізацыях:

• Журналістыка: падставовы курс (новая праграма);
• Найноўшая гісторыя (новая праграма);
• Філасофія/літаратура (новая праграма).

А таксама журналісцкія практыкумы (сумесна з Беларускай асацыяцыяй журналістаў).

Да ўдзелу ў конкурсе запрашаюцца студэнты старэйшых курсаў альбо асобы з вышэйшай адукацыяй. У выключных выпадках прымаюцца студэнты малодшых курсаў.

Падрабязную інфармацыю пра ўмовы паступлення можна знайсці тут.

Навучальныя праграмы "Беларускага калегіюма" арыентаваныя на выкладанне найноўшых фрагмэнтаў сучаснай веды і тэхнік інтэлектуальнай працы і не дублююць існуючыя праграмы дзяржаўных і недзяржаўных унівэрсытэтаў.

Сэртыфікат "Беларускага калегіюма" не замяняе дыплом аб вышэйшай адукацыі.

"Беларускі калегіюм" паўстаў у лістападзе 1997 года з ініцыятывы шэрагу няўрадавых беларускіх арганізацый і прыватных асоб і, як адукацыйны праект, зрэалізоўваецца з 1 кастрычніка 1998 года.

"Беларускі калегіюм" - форум для правядзення публічных лекцый і дыскусій, месца інтэлектуальнага і культурніцкага дыялогу, кантактаў і супрацоўніцтва з калегамі з сярэднеэўрапейскіх і заходніх краін.

"Беларускі калегіюм" аб’ядноўвае навукоўцаў, журналістаў, людзей мастацтва і культуры, грамадзкіх асоб з мэтай актуалізацыі шматкультурнай беларускай традыцыі і спрыяння дэмакратычным пераўтварэнням у беларускім грамадстве ў кантэксце вызначальных каштоўнасцей еўрапейскай цывілізацыі і агульнаеўрапейскіх працэсаў інтэграцыі.

Прынцыпы дзейнасці:

• заходне- і сярэднееўрапейскія культурніцкія практыкі ў ажыццяўленні навучальнага працэсу і навуковых даследаванняў;
• сучасныя еўрапейскія навучальныя тэхналогіі;
• параўнальны навуковы і навучальны падыход; крытычнае мысленне і адукацыя, заангажаваныя ў беларускую культурную традыцыю і сучасную сытуацыю;
• каштоўнасці адкрытага і дэмакратычнага грамадзтва.

Дадатковую інфармацыю можна атрымаць праз адрас электроннай пошты: [email protected].