Таварыства аховы помнікаў заклікае да вырашэння лёсу Гістарычнага цэнтра Мінска

З матэрыяламі праекта можна азнаёміцца і пакінуць свае пісьмовыя заўвагі ў холе 3-га паверха каля ўваходу ў актавую залю Адміністрацыі Цэнтральнага раёна Мінска (вул. Мельнікайтэ, 6).  Пісьмовыя заўвагі і прапановы можна накіраваць і па пошце па адрасу: 220004, г. Мінск, Адміністрацыя Цэнтральнага раёна Мінска, вул. Мельнікайтэ, 6 - з пазначэннем "Па пытанню грамадскага абмеркавання праекта дэтальнага планіравання Гістарычнага цэнтра Мінска".

Беларускае добраахвотнае таварыства аховы помнікаў гісторыі і культуры заклікае ўсіх, каму неабыякавы лёс нашай гісторыка-культурнай спадчыны і лёс нашага сталічнага гораду, азнаёміцца з праектнай дакументацыяй і не змагацца на форумах, а даслаць, адпаведна вызначанай працэдуры, заўвагі і прапановы ў пісьмовым выглядзе па пазначанаму ў інфармацыі адрасу. Са свайго боку Таварыства будзе дамагацца публічнай сесіі абмеркавання і паведаміць пра недахопы праекта ў плане яго неадпаведнасці дзеючым нарматыўна-прававым, тэхнічным і метадычным дакументам.

Адначасова Таварыства выказвае заклапочанасць, што такі горадабудаўнічы дакумент, які мае вялікую важнасць не толькі для сталіцы, але і для ўсёй дзяржавы,  абмяркоўваецца на ўзроўні раённай адміністрацыі, без запрашэння для ўдзелу ў абмеркаванні спецыялістаў у сферы працы з гісторыка-культурнымі каштоўнасцямі, прадстаўнікоў спецыялізаваных профільных грамадскіх аб’яднанняў, структур і творчых саюзаў.

Дадзены крок сталічных уладаў можна расцаніць, як спробу перспектыўнага зацвярджння праз фармальную працэдуру горадабудаўнічага дакумента, які легітымізуе ўсе ўжо адбыўшыяся парушэнні нарматыўна-прававых, тэхнічных і метадычных дакументаў пры правядзенні прац у Гістарычным цэнтры Мінска, і  перспектыўнае правядзенне прац у такім жа рэжыме, што канчаткова прывядзе да страты ўсіх якасных характарыстык комплекснай нерухомай матэрыяльнай гісторыка-культурнай каштоўнасці "Гістарычны цэнтр г. Мінска".

Усе на грамадскае абмеркаванне!