Абвешчаная літаратурная прэмія імя Ежы Гедройца

Прэмія ставіць мэтаю ўшанаваць памяць Ежы Гедройца (Erzy Gedroyc) (1906-2000) - польскага публіцыста, палітыка, заснавальніка і рэдактара парыжскага грамадска-палітычнага часопіса "Kultura" на польскай мове, піша "Будзьма". Ежы Гедройц нарадзіўся ў 1906 годзе ў Мінску і ў сваёй культурнай дзейнасці быў паслядоўным прыхільнікам добрасуседскіх зносінаў паміж Польшчай і Беларуссю, Літвой, Украінай.

Акрамя таго, прэмія мусіць паспрыяць паглыбленню польска-беларускіх стасункаў у галіне культуры, папулярызаваць сучасную беларускую літаратуру ў Беларусі і Польшчы, падтрымаць актуальных беларускіх пісьменнікаў, паспрыяць выхаду іх творчасьці на міжнародны ўзровень.

Літаратурная прэмія Гедройца прысуджаецца за найлепшую кнігу, якая была выдадзеная (у папяровым або электронным варыянтах) у 2012 годзе на беларускай мове ў жанрах “мастацкая проза”, “эсэістыка” (журы прэміі пакідае за сабой права вызначаць жанр твораў у спрэчных выпадках).

Намінаванне пройдзе ў тры этапы. Напачатку 2013 года будзе абвешчаны лонг-ліст прэміі (12 пазіцыяў). Напачатку лютага будзе абвешчаны шорт-ліст прэміі (6 пазіцыяў). Абвяшчэнне і ўшанаванне пераможцы(-аў) адбудзецца 3 сакавіка 2013 года, у Міжнародны дзень пісьменніка. Сярод узнагародаў - магчымасць выдаць кнігу ў Польшчы, літаратурныя стыпендыі і запрашэнні ў еўрапейскія дамы творчасці.

Права прапаноўваць кнігі для ўключэння ў лонг-ліст прэміі маюць: сябры журы, дырэктары выдавецтваў, кіраўнікі творчых суполак і пісьменніцкіх арганізацыяў, лаўрэаты прэміі папярэдніх гадоў. Для намінацыі кнігі на прэмію неабходна даслаць або перадаць у сядзібу Беларускага ПЭН-цэнтра падпісаную заяўку ў адвольнай форме, далучыўшы да яе 5 асобнікаў намінаванай кнігі. Склад беларуска-польскага журы ўзгадняецца і будзе абвешчаны ў пачатку лістапада.

Паштовы адрас: 220050, г. Мінск, а/с 218.

Адрас сядзібы Беларускага ПЭН-цэнтра: г. Мінск, вул. Залатая горка, 2-101.

Заяўкі прымаюцца да 28 снежня 2012 года.

Даведкі па пытаннях вылучэння можна зрабіць па нумары тэлефона: (+375 17) 2881461 (з 9:00 да 16:00 па буднях) ці па адрасе электроннай пошты: [email protected].