Аб’яўлены конкурс на стварэнне помніка князю Міндоўгу

Арганізатарамі конкурсу выступаюць Мінкультуры і Беларуская дзяржаўная акадэмія мастацтваў. Рашэнне аб стварэнні манумента і яго ўстаноўцы ў Навагрудку прынята сумесна Міністэрствам культуры, Гродзенскім аблвыканкамам і Навагрудскім райвыканкамам, паведаміла карэспандэнту БелТА прэс-сакратар Міністэрства культуры Юлія Віскуб.

Паводле слоў прэс-сакратара, кампазіцыйнае і пластычнае выкананне помніка павінны быць вытрыманы ў лепшых традыцыях класічнага і нацыянальнага манументальнага мастацтва. Помнік плануецца ўстанавіць у скверы на гарадской плошчы ў Навагрудку з улікам агульнай горадабудаўнічай сітуацыі і гісторыка-архітэктурнай каштоўнасці гістарычнага цэнтра горада, візуальнага ўспрымання манумента з розных участкаў плошчы.

Удзельнічаць у конкурсе могуць прафесійныя скульптары і архітэктары. Жадаючыя могуць падаць заяўку да 26 кастрычніка 2012 года на адрас: г. Мінск, прасп. Пераможцаў, 11, каб. 316.

Конкурсныя матэрыялы будуць разгледжаны журы на закрытым пасяджэнні не пазней за 2 лістапада 2012 года.

Помнік будзе створаны за кошт пазабюджэтных сродкаў. Усе жадаючыя ўнесці ўклад у яго стварэнне могуць пералічыць грошы на дабрачынны разліковы рахунак, адкрыты Навагрудскім райвыканкамам.

Як растлумачыла Юлія Віскуб, у 2011 годзе Міністэрства культуры Беларусі па ўзгадненню з Гродзенскім аблвыканкамам ужо аб'явіла конкурс на стварэнне эскізных праектаў помніка Міндоўгу ў Навагрудку. Аднак тады не было вызначана месца ўстаноўкі манумента, у сувязі з чым конкурс было вырашана правесці нанава.