Пікет Партыі БНФ супраць расійскай авіябазы не дазволілі, каб не замінаў пешаходам

У размове з Радыё Свабода Аляксей Янукевіч распавёў: «Адмовілі, спаслаўшыся на тое, што заяўка не адпавядае артыкулу 9 „Закону аб масавых мерапрыемствах“. У тлумачэнні гаворыцца, што ў заяўцы не пазначана, якія канкрэтна захады будуць зробленыя для забеспячэньня парадку падчас правядзення пікету, а таксама, што ў час, калі мы хочам правесці мерапрыемства, — 29 ліпеня з 16:00 да 16:30, пікет будзе ствараць перашкоды для пешаходанага і аўтамабільнага руху».

Лідар Партыі БНФ лічыць адмову неабгрунтавай і незаконнай. Кажа, што будзе абскарджваць яе ў судзе, бо насамрэч дакумент быў створаны паводле ўсіх стандартаў і ўтрымліваў інфармацыю пра тое, што заяўнік бярэ на сябе адказнасць за забеспячэнне медычнай дапамогі і прыборкі тэрыторыі.

У красавіку міністар абароны Расіі Сяргей Шойгу заявіў, што да 2015 году Масква плануе размясціць на беларускай тэрыторыі сваю авіябазу для абароны паветраных межаў «саюзнай дзяржавы».

Расійская авіябаза будзе месціцца ў Лідзе і пачне дзейнічаць ужо ў 2013 годзе. Пра гэта пазней паведаміў галоўнакамандуючы ВПС Расеі Віктар Бондараў.

У 2013 плануюць старыць авіяцыйную камендатуру і паставіць на дзяжурства на беларускай тэрыторыі некалькі расійскіх самалётаў-знішчальнікаў СУ-30.