Партыя БНФ падала заяўку на пікет супраць расійскай авіябазы

Пікет будзе прымеркаваны да гадавіны прыняцця Дэкларацыі аб дзяржаўным сувэрэнітэце Рэспублікі Беларусь 27 ліпеня, паведамляе прэс-служба Партыі БНФ.
Месцам правядзення плануецца пляцоўка насупраць амбасады Расійскай Федэрацыі ў Мінску.

- Партыя БНФ выступае супраць імперскай і неакаланіяльнай палітыкі, якую Крэмль спрабуе весці на постсавецкай прасторы, у першую чаргу, у дачыненні да нашай краіны. Расія ўжо перайшла да адкрытых дзеянняў, скіраваных на ператварэнне Беларусі ў буферную зону па абароне сваіх інтарэсаў. Мы лічым абсалютна недапушчальным размяшчэнне ў Беларусі расійскіх авіяцыйных базаў, а таксама патрабуем вываду з тэрыторыі нашай краіны ўжо размешчаных вайсковых аб’ектаў РФ: Ганцавіцкай РЛС і Вілейскай базы сувязі, – заявіў Аляксей Янукевіч.

Паводле старшыні Партыі БНФ, размяшчэньне на тэрыторыі Беларусі расійскіх вайсковых базаў і аб’ектаў супярэчыць нацыянальным інтарэсам і Канстытуцыі Рэспублікі Беларусь, а таксама ставіць пад пагрозу бяспеку кожнага беларуса.

Адказ Мінгарвыканкама на зяўку пра правядзенне пікета павінны быць дадзены да 24 ліпеня.

Нагадаем, што пра планы размясціць на тэрыторыі Беларусі авіябазы заявіў расійскі міністр абароны Сяргей Шайгу падчас сустрэчы з прэзідэнтам Беларусі Аляксандрам Лукашэнкам у красавіку гэтага году. Пазней стала вядома, што месцам размяшчэння авіябазы стане горад Ліда Гродзенскай вобласці.