У Швецыі ідзе падрыхтоўка новага “плюшавага дэсанту”

На гэты раз адпраўляць у Беларусь мядзьведзікаў з патрабаваннямі выканання правоў чалавека будуць цалкам легальна – у бандэролях, паведамляе сайт Праваабарончага цэнтру “Вясна”.

Адрасатамі-атрымальнікамі бандэроляў будуць беларускія чыноўнікі і палітыкі з «чорнага спісу» ЕС.

"Калі 800 шведскіх мішак летам «заляцелі» у Беларусь, Лукашэнка быў раз'юшаны і папракаў у тым, што яны незаконна перасеклі мяжу дзяржавы. Іх затрымлівалі і вазілі ў аддзяленні міліцыі. Таму мы збіраемся даслаць мішак ў бандэролях, але зноў - з патрабаваннямі выканання правоў чалавека, асабліва свабоды сходаў і асацыяцый, проста Лукашэнку і яго сябрам”, - распавёў старшыня Östgruppen Марцін Уггла.

“У Швецыі летняя акцыя выклікала даволі шмат крытыкі, а ў Беларусі яна была сустрэтая пазітыўна многімі актывістамі. Мы сваёй акцыяй хочам выказаць сваю падтрымку беларусам, якія працуюць на дэмакратызацыю сваёй краіны”,- сказаў кіраўнік праваабарончай арганізацыі.

Акцыя пройдзе ў цэнтры Стакгольма 10 лістапада, пачатак у 12:00. Удзельнікі прывязуць з сабой мядзьведзікаў, а арганізатары дадуць ім адрасы атрымальнікаў з Беларусі.