Беластоцкая «Ніва» адзначае 60-годдзе

Узгадаць мінулае прыйшлі цяперашнія і колішнія журналісты і карэспандэнты, а таксама сябры «Нівы». Паводле галоўнага рэдактара газеты Яўгена Вапы, «Ніва» з самага пачатку закранала важныя для беларусаў тэмы.

— З канца 50-х у 60-я «Ніва» ужо запісвала ўспаміны пра бежанства. Тое, што бежанства раптам адкрываецца, дык гэта «Ніва» захавала бежанства. Толькі калі хтосьці не чытаў і не хоча на яе спасылацца, дык не ведае, што «Ніва» пісала пра бежанства ад пачатку свайго існавання.

У «Ніве» публікуюцца артыкулы пра жыццё беларусаў у Польшчы, пра дзейнасць грамадскіх арганізацый, друкуюцца краязнаўчыя матэрыялы і рэпартажы, нагадвае «Радыё Рацыя».

Амаль з самага пачатку выходзіць таксама дадатак для дзяцей «Зорка», ягоная рэдактарка Ганна Кандрацюк, лічыць што калектыў «Нівы» заўсёды стваралі не толькі журналісты, але таксама карэспандэнты і чытачы.

— «Ніва» — гэта вельмі вялікая сіла з боку чытачоў, з боку карэспандэнтаў, якія разам з журналістамі ствараюць, прапаноўваюць тэмы. І гэтае кола супрацоўнікам вельмі цеснае.