Freedom House: Свабоды ў інтэрнэце стала меней

Дзве траціны карыстальнікаў інтэрнэту жывуць у краінах, дзе пад цэнзурай крытыка ўраду, вайскоўцаў ці кіроўнай сямʼі краіны. А 27% жывуць у краінах, дзе могуць пасадзіць за лайкі і рэпосты. Карыстальнікі сацсетак сутыкаюцца з беспрэцэдэнтнымі пакараннямі, за год у 38 краінах адбываліся арышты за пасты ў сацсетках. Урады ўсё болей спрабуюць кантраляваць абароненыя месэнджеры кшталту Telegram.

Горш за ўсё са свабодай інтэрнэту ў Кітаі, Сырыі і Іране, але ў спісе несвабодных краінаў таксама Беларусь, Расія, Казахстан, Кітай, Саўдаўская Аравія, Турцыя, Узбекістан, Егіпет і іншыя. Паступова пагаршаюцца справы ў прызнанай часткова свабоднай Украіне. А блізкая да Беларусі Эстонія наадварот у лідэрах рэйтынгу свабоды інтэрнэту разам з Ісландыяй.

Сітуацыя са свабодай у байнэце — беларускім сегменце інтэрнэту — стала крыху лепей у 2016 годзе, сцвярджае Freedom House. З 64 балаў "несвабоды" (максімум 100), якія Беларусь мела ў 2015-м, краіна "адкацілася" да ўзроўню 2014 году — 62 балы "несвабоды". У 2011-2012 годзе Беларусь мела 69 балаў.

Але рэйтынг складаўся за перыяд з чэрвеня 2015 году па травень 2016-га, яшчэ да суду над блогерам Эдуардам Пальчысам, якога прызналі вінаватым у "распальванні варожасці" і "распаўсюдзе парнаграфіі"; да ўказу Лукашэнкі, паводле якога маглі б, але не забаранілі Skype і Viber; да паведамлення Аmnesty Іnternational пра тое, што беларускія мабільныя аператары дапамагаюць спецслужбам Беларусі незаконна сачыць за людзьмі, паведамляе "Радыё Свабода".