У сацсетках Эрдагана падазраюць у інсцэніроўцы вайсковага перавароту

Брытанская The Independent паведамляе пра вэрсіі, якія пашыраюцца ў турэцкіх сацыяльных сетках.

Газета адзначае, што карыстальнікі сацыяльных сетак параўноўваюць няўдалую спробу вайсковага перавароту з падпалам Райхстагу Гітлерам у 1933 годзе, ужытым пасля для расправы з палітычнымі апанентамі, піша "Радыё Свабода".

«Некаторыя назіральнікі пачалі выказваць меркаванні, што гэты пераварот быў зрэжысіраваны, каб даць магчымасць Эрдагану ачысціць войска ад апанентаў і ўзмацніць свой кантроль над Турцыяй», — піша газета.

«Магчыма, мы ўбачым датэрміновыя выбары, на якіх ён (Эрдаган — РС) пастараецца гарантаваць сабе неверагодную большасць галасоў. Магчыма, мы ўбачым змену канстытуцыі да горшага, з яе сыдзе свецкасць і прыйдуць ісламісцкія матывы», — піша ў сваю чаргу карэспандэнт еўрапейскага выдання інтэрнэт-газеты «Politico» Раян Гіт, цытуючы словы сваёй крыніцы ў Турцыі, якая таксама назвала спробу перавароту ў Турцыі пастановачнай.

Прыхільнікі гэтай версіі, працягвае The Independent, цытуюць словы прэзідэнта Турэччыны аб спробе перавароту, якія ён прамовіў перад сваімі прыхільнікамі ў аэрапорце Стамбулу. «Гэта падарунак Алаха», — цытуе газэта Эрдагана.

Паводле дадзеных, якія падаў турэцкі тэлеканал NTV, пасля няўдалай спробы вайсковага перавароту ў Турэччыне знятыя з пасадаў больш за 2,7 тысячы супрацоўнікаў судовых установаў.

Кіраўнік ураду Турцыі Біналі Iлдырым у сваю чаргу паведаміў, што ва ўзброеных сілах краіны пасадаў пазбавіліся пяць турэцкіх генералаў і 28 палкоўнікаў.

Акрамя таго, паводле яго, не менш за 2,8 тыс. прадстаўнікоў вышэйшага і сярэдняга звяна турэцкіх узброеных сіл затрыманыя пасля правалу спробы вайсковага перавароту ў Турцыі.

У выніку спробы ваеннага перавароту ў Турцыі загінуў 161 чалавек. Яшчэ 1440 чалавекі атрымалі раненні.