Вялікабрытанія прагаласавала за выхад з ЕС

Перавага прыхільнікаў «брэксіта» перавысіла 1,1 млн. Для перамогі трэба было набраць 16,8 млн галасоў. Засталося падлічыць вынікі ў 2 з 382 акругаў, але гэта ўжо не паўплывае ні на што.

Яўка на рэферэндуме склала 72,08%, піша The Guardian

Многія праціўнікі «брэксіта» з абурэннем звярнулі ўвагу на тое, што ў сваёй пераможнай прамове лідар Партыі незалежнасці Найджэл Фарадж сказаў: «Мы дамагліся гэтага без адзінага стрэлу».

А вось у Шатландыі і Паўночнай Ірландыі большасць акругаў прагаласавалі супраць «брэксіта». Так жа паступілі выбаршчыкі ў Лондане.

На фоне навін аб рэферэндуме пачаў падаць курс фунта. Кошт брытанскай нацвалюты раніцай 24 чэрвеня зваліўся на 9,5% да 1,35 далара. Гэта самае нізкае значэнне з 1985 года, адзначае Bloomberg.

Daily Telegraph: «З палітычнай кар'ерай Дэвіда Кэмерана скончана. Ён увойдзе ў гісторыю як прэм'ер-міністр, які паставіў на кон месца Брытаніі ў Еўрапейскім Саюзе і сваю ўласную кар'еру — і прайграў».

Пры падліку вынікаў рэферэндуму прымаюцца не вынікі рэгіёнаў, як пры звычайным галасаванні ў Брытаніі, а агульная колькасць галасоў за ці супраць «брэксіта».

Усяго на рэферэндуме маглі прагаласаваць больш 46,5 мільёна чалавек, паведамляе "Наша Ніва".