На Еўрабачанні-2016 перамагла Украіна

В Украине

Пераможцай Еўрабачання-2016 стала 32-гадовая ўкраінская спявачка Джамала. Яна выконвала песню «1944» пра трагічны лёс крымска-татарскага народа і яго дэпартацыю ў 40-ыя гады.

На другое месца Джамалу паставілі як журы краін Еўропы, гэтак і гледачы. Аднак гэтага хапіла, каб у выніку заняць першае месца.

Журы галасавала за Дэмі Ім, гледачы — за Сяргея Лазарава, адзначае "Наша Ніва".

Другое месца ў спявачкі з Аўстраліі карэйскага паходжання Дэмі Ім.

Трэцяе ўзяў выканаўца з Расіі Сяргей Лазараў «You Are the Only One» («Ты — адзіная»). Менавіта Лазарава доўгі час лічылі фаварытам конкурсу.

Цікава, што тэлегледачы надзвычай высока ацанілі польскага выканаўца Міхала Шпака, які быў толькі 25-ы ў галасаванні журы, а сваімі смс-камі і званкамі яго паднялі аж на трэцяе месца. У выніку Шпак заняў аж шостае месца.

Беларускае журы 12 балаў аддала Расіі, 10 – Літве, 8 – Швецыі, 7 – Украіне.

Украіна ў другі раз перамагае на Еўрабачанні. Першай пераможцай у 2004 годзе была Руслана.