Крымскія татары могуць стварыць войска

В Украине

Пасля забароны дзейнасці Меджліса на паўвостраве крымскататарскі народ усведамляе неабходнасць стварэння ўласнага войска. Пра гэта ў інтэрв'ю радыё «Свабода» заявіў адзін з лідараў крымскататарскага народа Ленур Ісламаў.

«Магчыма, зараз крымскататарскі народ зразумее, што ўсё ж такі трэба ствараць уласную армію. У нас ёсць палітычныя свае сілы, у нас ёсць дэпутаты Вярхоўнай Рады, але ў нас няма ўласнага войска. Таму мы павінны зрабіць так, каб у нас была армія, у складзе Украіны, у абліччы батальёна Намана Чэлебіджыхана», — адзначыў Ісламаў.

Нядаўна расійскія ўлады прызналі экстрэмісцкай арганізацыяй Меджліс крымскататарскага народа — структуру, якая аб'ядноўвала крымскіх татар.

Да канца ХІХ ст. крымскія татары складалі большасць насельніцтва Крыма, але ў выніку расійскай каланізацыі і дэпартацыі карэнных народаў паўвострава па стане на канец ХХ ст. татараў засталося менш за 15%. Крымскія татары спрабавалі сарваць анексію Крыма ў 2014 годзе, але не мелі для таго збройнай сілы.

Крымскіх татараў у Крыме жыве цяпер каля 250 тысяч. Яны вылучаюцца высокім узроўнем культуры, адукацыі і самаарганізацыі, піша "Наша Ніва".