Прэзідэнт Мʼянмы вызваліў 63 палітвязня

Усяго з розных турмаў краіны было вызвалена 83 чалавекі, паведамляецца, што 63 з іх — былыя палітвязні. У заяве прэзідэнта, апублікаванай на старонцы ў Фэйсбуку, гаворыцца, што мэта амністыі — «усяліць у людзей радасць і супакой і прымірыць нацыю перад Новым годам».

Двухтыднёвыя навагоднія святы пачынаюцца ў Мʼянме ў сярэдзіне красавіка.

У лістападзе мінулага году партыя «Нацыянальная ліга за дэмакратыю» выйграла прэзідэнцкія выбары. Лідэр партыі і нобелеўскі лаўрэат Аун Сан Су Чжы была адхіленая ад удзелу ў выбарах, бо яе муж і дзеці маюць брытанскае грамадзянства. Прэзідэнцкія выбары выйграў яе паплечнік Тхін Чжо, ён стаў першым грамадзянскім кіраўніком краіны за апошнія 50 гадоў, паведамляе "Радыё Свабода".