Расійскія лекары не знайшлі прычын для шпіталізацыі Надзеі Саўчанкі

В Украине

Пра гэта паведамляе Інтэрфакс са спасылкай на прэс-службу расійскай Федэральнай службы выканання пакаранняў (ФСВП).

У панядзелак прэс-служба ФСВП паведаміла, што Надзея Саўчанка дала пісьмовую згоду на рэгулярныя медычныя агляды і тэрапію.

Пра тое, што асуджанай у Расіі ўкраінскай ваеннаслужачай, якая з 6 красавіка трымае сухую галадоўку, можа спатрэбіцца шпіталізацыя, напярэдадні паведаміла яе сястра Вера Саўчанка.

Пазней адвакат Марк Фейгін паведаміў, што лекары маюць намер змясціць Саўчанку ў шпіталь у пятніцу. Іншы адвакат украінкі, Мікалай Полазаў, наведаўшы яе ў СІЗА, распавёў, што Саўчанка вельмі «худая, з чорнымі кругамі пад вачыма». Аднак, нягледзячы на рызыку для жыцця, яго падабаронная адмовілася легчы ў шпіталь і спыніць сухую галадоўку. Яна «вельмі чакае допуску да яе незалежнай камісіі лекараў. Украінскіх ці нямецкіх медыкаў».

22 сакавіка 2016 года Данецкі гарадскі суд Растоўскай вобласці прызнаў Саўчанку вінаватай у садзейнічанні забойству двух расійскіх журналістаў пад Луганскам летам 2014 года і прысудзіў ёй 22 гады калоніі агульнага рэжыму.

У аўторак, 5 красавіка, прысуд набыў моц, а на наступны дзень Саўчанка абвясціла ў турме сухую галадоўку з патрабаваннем вярнуць яе ва Ўкраіну, нагадвае "Радыё Свабода".