Улады Турцыі не маюць сумневу, што напад у Анкары здзейсніла тэрарыстычная групоўка

Прэм’ер-міністар Турцыі Ахмет Давутаглу паведаміў, што ўлады і следчыя не сумняюцца ў тым, што нядзельная атака ў Анкары здзейсненая адной з тэрарыстычных груповак:

«Улада мае канкрэтную інфармацыю пра здзяйсненне нападу тэрарыстычнай групоўкай», — заявіў Давутаглу, нягледзячы на тое, што ні адна з групаў баевікоў адказнасць за выбух на сябе не ўзяла.

Раней міністр унутраных спраў Турцыі Эфкан Ала заявіў, што сёння, 14 сакавіка, павінны быць абвешчаныя вынікі расследавання выбуху ў Анкары.

Паводле апошніх дадзеных, ахвярамі выбуху ў турэцкай сталіцы ў нядзелю сталі 34 чалавекі, 125 параненыя. Паведамляецца, што побач з месцам выбуху, прыкладна ў 20 метрах, у сваім аўто быў амбасадар Аўстраліі ў Турцыі Джэймс Ларсэн. Дыпламат не пацярпеў.

Выбух у Анкары прагрымеў 13 сакавіка каля аўтобуснага прыпынку, размешчанага паблізу парку Гювен на плошчы Кызыла. Паводле папярэдніх звестак, выбухоўка спрацавала ў адным з аўтамабіляў. Полымя ахапіла таксама транспартныя сродкі побач, паведамляе "Радыё Свабода".