Папа Францыск прыедзе ў Польшчу

Пантыфік Францыск наведае Польшчу з 27 па 31 ліпеня з нагоды Усясветнага дня моладзі, паведаміў Polskie Radio арцыбіскуп Кракава Станіслаў Дзівіш. Візіт адбудзецца па запрашэнні польскай біскупскай канферэнцыі і польскіх дзяржаўных органаў улады, перадае "Радыё Свабода".

Падчас візіту Папа сустрэнецца з прэзідэнтам Польшчы Анджэем Дудам, возьме ўдзел у святкаванні 1050 гадавіны хрышчэння Польшчы ў Чэнстахове і Усясветнага дня моладзі ў Кракаве, а 29 ліпеня, калі касцёл згадвае пакуты і смерць Хрыста, наведае музей у былым канцлагеры «Аўшвіц» у Асвенцыме.

Арцыбіскуп Кракава адзначае, што такі візіт - гэта не толькі гонар для палякаў, але і выклік для ўладаў і касцёлу, а таксама магчымасць прасоўвання касцёлу ў Польшчы, а Польшчы – у свеце. Ён заклікае палякаў шырока адчыняць дзверы тым, хто прыбудзе на святкаванне Усясветнага дня моладзі:

«Не бойцеся прыняць маладзёнаў, якія ўнясуць у вашыя сем’і радасць і спакой. З асабістага досведу ведаю, як шмат добрага нараджаецца ў такіх сустрэчах», – кажа ён, згадваючы, што на свята прыедуць прадстаўнікі 174 краінаў, у тым ліку вялікая дэлегацыя з Беларусі.

Тым не меней, межы Польшчы ў дні візіту не будуць абсалютна адчыненымі: на гэты час, а таксама падчас папярэдняга саміту NATO ў Варшаве, што пройдзе 8-9 ліпеня, Польшча ў мэтах бяспекі адновіць памежны кантроль. Так Польшча ўжо рабіла падчас Чэмпіянату Еўропы па футболе ў 2012 годзе і кліматычнага саміту ў 2013-м. Міністэрства ўнутраных справаў таксама чакае, што да пачатку мерапрыемстваў будзе прыняты новы антытэрарыстычны закон.