Следства: забойства Нямцова не было палітычным

Пра гэта паведамляе агенцтва Інтэрфакс з пасяджэння Басманнага суду, дзе разглядаецца скарга пацярпелых на адмову ў перакваліфікацыі справы, піша "Радыё Свабода".

У верасні дачка Барыса Нямцова папрасіла Следчы камітэт Расіі перакваліфікаваць абвінавачванне па справе аб забойстве бацькі і вынесці абвінавачанне не па артыкуле «Забойства», а па артыкуле «Замах на жыццё дзяржаўнага або грамадзкага дзеяча». Адвакат Жанны Нямцовай падкрэсліў, што на момант забойства Нямцоў быў сустаршынём партыі РПР-ПАРНАС і дэпутатам Яраслаўскай абласной думы.

Адвакат Вадзім Прохараў, які прадстаўляе інтарэсы пацярпелых, таксама заявіў у пятніцу, што забойства Нямцова не звязанае з яго выказваннямі з нагоды карыкатураў на прарока Мухамеда ў францускім часопісе Charlie Hebdo, паколькі яны былі апублікаваныя ў студзені 2015 года, а забойства рыхтавалася з вераьня 2014-га. Пра гэта паведамляе агенцтва «РИА Новости».

Барыс Нямцоў быў забіты позна ўвечары 27 лютага ў цэнтры Масквы. Цяпер пад вартай па абвінавачваннях у датычнасці да забойства знаходзяцца пяць чалавек: Заур Дадаеў, браты Анзор і Шадзід Губашавы, Тэмерлан Эскерханаў і Хамзат Бахаеў. Заказчык злачынства не выяўлены.