Польшча забараніла ў'езд сябрам Пуціна - байкеру "Хірургу" і ягоным паплечнікам

Улады Польшчы забаранілі ўезд у краіну удзельнікам расійскага байк-клубу "Начныя ваўкі", які планаваў мотапрабег у гонар 70-годдзя перамогі над фашызмам, паведамляе "Радыё Свабода". 

У паведамленні, апублікаваным на сайце Міністэрства замежных справаў Польшчы, гаворыцца, што падставай для забароны стала адсутнасць дакладнай інфармацыі аб графіку перамяшчэння групы байкераў па тэрыторыі Польшчы і іх асабістых дадзеных. Гэтыя дадзеныя, удакладняюць польскія ўлады, неабходныя для забеспячэння бяспекі ўдзельнікаў прабегу .

Міністэрства таксама зазначае, што занадта позна атрымала ад расійскага боку заяўку на правядзенне акцыі. Паводле польскіх дыпламатаў, заяўка прыйшла менш чым за тыдзень да пачатку запланаванай расійскімі байкерамі акцыі. Пры гэтым заяўкі на іншыя аналагічныя акцыі, якія паступілі з Расіі, былі задаволеныя.​

Але "Начныя ваўкі" плануюць трапіць у Польшчу, нягледзячы на адмову ва ўездзе. Па словах аднаго з расійскіх байкераў, яны не збіраюцца мяняць маршрут і паспрабуюць пераехаць беларуска-польскую мяжу.