Эфір на беларускай мове зладзіла "Эхо Москвы"

На радыё «Эхо Москвы» прайшоў беларускамоўны эфір. Расійская радыёстанцыя у ноч з 26 на 27 верасня зладзіла «Беларускую гадзіну», піша Наша Ніва.

З 2 да 3 гадзіны ночы ў эфіры гучала беларуская мова. Вяла перадачу журналістка Аліна Грабнёва (беларуска, ураджэнка Бабруйску, якая даўно ўжо працуе ў маскоўскіх СМІ).

Падчас «Беларускай гадзіны» абмяркоўвалася палітыка, праводзіліся апытанкі: вядучая цікавілася, ці стала ў жыцці расіян больш беларускіх тавараў пасля ўвядзення санкцый, і ці хацелі б слухачы, каб Лукашэнка стаў прэзідэнтам Расіі (дарэчы, большасць аудыторыі выказалася супраць такой ідэі).

Гучала беларуская музыка («Песняры», «Ляпіс Трубяцкі», NRM). Праводзіліся і моўныя конкурсы: напрыклад, расійскім слухачам прапаноўвалася здагадацца, што такое «навальніца» ці «дыван». Пераможцы атрымалі у падарунак кнігі Васіля Быкава (праўда, перакладзеныя на расійскую).