У Берліне адзначылі гадавіну Варшаўскага паўстання

- Варшаўскае паўстанне было супрацівам свабодных людзей, якія арганізаваліся ў структурах польскай падпольнай дзяржавы, - сказаў Браніслаў Камароўскі ў Берліне падчас цырымоніі адкрыцця выставы, прысвечанай 70-годдзю гэтай крывавай падзеі.

Разам з польскім прэзідэнтам ва ўрачыстасцях удзельнічаў прэзідэнт Германіі Ёахім Гаўк, піша Беларуская рэдакцыя Польскага радыё.

Браніслаў Камароўскі адзначыў, што адкрыцьцё выставы ў такім месцы кранае:

- Мне цяжка ўтойваць узрушэнне, што ў прысутнасці прэзідэнта свабоднай Германіі, многіх паважаных гасцей і жыхароў Берліну, мы адкрываем выставу ў гонар Варшаўскага паўстання. Гэта была найбольш крывавая бітва ў гісторыі Польшчы і адно з найбольш гераічных памкненняў у трагічным перыядзе Другой сусветнай вайны.

Музейная выстава "Тапаграфія тэрору”, якая адкрылася ў Берліне, складаецца з фатаграфіяў і апісанняў прадстаўленых на іх падзеяў. Пры нагодзе выставы быў запушчаны адмысловы сайт на нямецкай і ангельскай мовах.