У Магілёве школьных настаўніц прымушаюць шукаць “дармаедаў”

У сярэднім у кожным з іх каля 40 прозвішчаў з адрасамі прапіскі. Абыйсці кватэры ў прымацаванай да настаўнікаў мікразоне неабходна да пятніцы 24 сакавіка, паведамляе "Магілёўскі рэгіён". Адміністрацыі школаў нічога падначаленым не тлумачаць, дырэктары толькі выдаюць распараджэнні, спасылаючыся на загад зверху. Лічыцца, што настаўнікі лепш за іншых ведаюць, хто жыве ў спальных раёнах каля школы, бо яны і так мусяць знаёміцца з сем’ямі сваіх вучняў.

Пакватэрны абыход ужо выклікаў некалькі канфліктных сітуацый. Напрыклад, валантэрка Вераніка Цэдрык, якая трапіла ў “дармеды” з-за таго, што ў 2015 годзе пяць месяцаў знаходзілася ў Польшчы па міжнародным абмене, была здзіўленая тым, што прыватная інфармацыя трапіла з падаткавай інспекцыі ў трэція рукі. Настаўнікі, кажа яна, раззлаваныя новым абавязкам і не асабліва клапоцяцца пра захванне таямніцы. А тым часам падчас абыходу, працягвае яна, высвятляюцца пяць пытанняў: якая ў патэнцыйнага “дармаеда” адукацыя; агульны стаж працы; апошнае месца працы; ці працуе чалавек зараз і калі не, то чаму; ці зарэгістраваны беспрацоўны ў службе занятасці.

Самі настаўніцы, злоўленыя “дармаедамі” ў пад’ездах, жаляцца, што акрамя фальсіфікацыі выбараў іх цяпер прымушаюць займацца і паляваннем на беспрацоўных. Аднак адмовіцца яны не могуць, каб самім не згубіць працу. Прэзідэнт раней казаў, што чыноўнікі асабіста пойдуць па хатах, каб азнаёміцца з рэальным станам рэчаў у сем’ях беспрацоўных, але ў выніку гэтым прымусілі займацца самую неабароненую частку бюджэтнікаў. Куды далей пасля пятнцы пойдуць спісы, настаўніцы не ведаюць.