Яшчэ два затрыманні: Міраслаў Лазоўскі і Андрэй Дундукоў

Увечары 21 сакавіка ў мінскай кватэры Міраслава Лазоўскага адбыўся вобшук. Ён пачаўся каля 20-й і трываў каля дзвюх гадзін. Сам Міраслаў прысутнічаў, яго прывезлі людзі ў масках, ён быў моцна збіты, паведаміла Радыё Свабода сяброўка Лазоўскага Ніна Шыдлоўская.

Паводле папярэдніх звестак, пасля ператрусу Міраслава Лазоўскага павезлі ў следчы ізалятар Міністэрства ўнутраных спраў на вул. Валадарскага.​

Міраслаў Лазоўскі працуе памочнікам дырэктара выдавецтва «Кнігазбор». На пачатку 1990-х ён быў адным са стваральнікаў арганізацыі «Белы Легіён». Сябры «Белага Легіёна» былі актыўнымі ўдзельнікамі ўсіх мітынгаў і шэсцяў у 1996-1999 гадах. Арганізацыя працавала падпольна і спыніла сваё існаванне на пачатку 2000-х.

Апошні раз узгадкі пра «Белы Легіён» зьявіліся ў 2008 годзе, калі былых кіраўнікоў арганізацыі Ігара Корсака, Міраслава Лазоўскага і Сержука Чыслава затрымалі па справе выбуху 3 —га ліпеня 2008 года, аднак у хуткім часе вызвалілі з-пад варты.

На гэтым тыдні Лазоўскі паведаміў, што яго профіль у Фэйсбуку быў узламаны і невядомая асоба ад яго імя распаўсюджвала інфармацыю пра падрыхтоўку да вулічнай акцыі 25 Сакавіка.

Таксама Ніна Шыдлоўская распавяла, што мінулай ноччу быў затрыманы былы актывіст Андрэй Дундукоў.

Паводле яе звестак, Андрэя Дундукова затрымалі, калі ён разам з жонкай і дзіцем ехаў на адпачынак. У чым абвінавачваюць Дундукова, невядома

Пра Андрэя Дундукова вядома, што ён аматар экстрэмальнага турызму з досведам скачкоў з парашутам і без, вадалажання, промаальпінізму, страйкболу.

Як паведамляла "ЕўраБеларусь", 21 сакавіка ў Мінску таксама быў затрыманы кнігараспаўсюднік Алесь Яўдаха. Інцыдэнт здарыўся адразу па заканчэнні цырымоніі ўзнагароджання лаўрэатаў літаратурнай прэміі «Дэбют» на вуліцы Кастрычніцкай, каля сядзібы творчай прасторы «​ЦЭХ»​.