У Мазыры некалькі дзясяткаў чалавек выйшлі пратэставаць ля помніка Леніну

 Адзін з удзельнікаў стыхійнага сходу паведаміў "Радыё Свабода":

«Ідзе дождж, мокры сьнег, але гараджане пакуль не сыходзяць. Уголас абураюцца цяжкім станам жыцця, скарачэннямі на прадпрыемствах, нізкімі заробкамі».

Да людзей падыходзіў намеснік начальніка РАУС, папярэджваў, што сход незаконны. Аднак людзі надалей стаяць каля помніка «правадыру ўсясветнай рэвалюцыі Ўльянаву-Леніну».

Два дні таму міліцыя афіцыйна папярэдзіла мясцовага актывіста Рыгора Крывіцкага, каб ён не выходзіў на плошчу. Пенсіянер «засвяціўся» тым, што падаў заяўку на пікет 26 сакавіка ў Мазырскі райвыканкам. Сам заяўнік прыйшоў на некалькі хвілін на плошчу, расказаў пра папярэджанне і сышоў.

Паводле відавочцаў, траса Кобрынь—Гомель поўная экіпажаў патрульных машын ДАІ. Стаяць яны на ўездах у Мазыр, у Рэчыцу.

Гомельскі журналіст-фрылансер Кастусь Жукоўскі распавёў, што ягоную аўтамашыну інспэктары ДАІ (бартавы нумар 407) дагналі на трасе з уключанай мігалкай прыкладна праз дзесяць кіляметраў ад абласнога цэнтру.

«Казалі нешта няўцямнае пра няправільны абгон, патрабавалі адчыніць багажнік. Я не супраць, але толькі з панятымі. З напарнікам мы ехалі ў Рэчыцу, цяпер сядзім у машыне, чакаем панятых. Побач і экіпаж ДАІ», — паведаміў Кастусь Жукоўскі.

Раней на трасе блізу Рэчыцы ДАІ спыніла аўтамашыну журналісткі-фрылансэра Ларысы Шчыраковай. Правяраюць, ці яе аўтамабіль не сагнаны.