Выйшла кніга пра Глыбокае, калі яно было габрэйскім мястэчкам

Кніга больш чым на 300 старонках аб’яднала ў сабе фальклор, этнаграфію, эпіграфіку і архіўныя матэрыялы пра жыццё габрэяў мястэчка Глыбокае ў Заходняй Беларусі.

Па словах аднаго з аўтараў кнігі, навуковай супрацоўніцы Глыбоцкага гісторыка-этнаграфічнага музея Маргарыты Кажанеўскай, матэрыялы для кнігі былі сабраныя падчас школы-экспедыцыі Цэнтра «Сэфер» і Цэнтра славяна-юдаікі Інстытута славяназнаўства РАН і ў ходзе архіўных пошукаў.

– Цягам палутара гадоў стваралася кніга з артыкулаў, - распавяла Кажанеўская «Радыё Рацыя». - Таксама рабілі каталог могілак. Ёсць шэраг дакументаў, падрыхтаваных да друку, з Маладэчанскага архіву і з Віцебскага. Ёсць звесткі з Вашынгтонскага архіву Халакосту. Працавалі перш за ўсё навукоўцы з Расейскай акадэміі навук, навукоўцы з Кіева, я – з Глыбокага, і “Сэфер” звязваўся з выхадцамі з Глыбокага, якія таксама дапамагалі архівамі і сваімі ўспамінамі.

Кніга выйшла невялікім накладам. Яна не прадаецца, а замаўляецца ў цэнтры “Сэфер”, таксама яе можна спампаваць у Інтэрнэце. Кніга будзе карысная як для гісторыкаў, этнографаў, фалькларыстаў, так і для шырокага кола чытачоў. Падобнага кшталту кнігі маюць толькі Жалудок Гарадзенскай і Лепель Віцебскай абласцей.