Міхась Жызнеўскі пасмяротна стане грамадзянінам Украіны

В Украине

«Нас з Міхаілам Пятровічам запрасілі ва Украіну, — сказала ў тэлефоннай размове Свабодзе Ніна Жызнеўская. — І мы зрабілі гэтую справу. Спадзяёмся, што гэта здыме заканадаўчыя перашкоды, бо неграмадзянам Украіны не могуць надавацца вышэйшыя званні і ўзнагароды. Чакаем, што бліжэйшым часам украінскі прэзідэнт Пятро Парашэнка падпіша ўказ на прысваенне нашаму сыну высокага звання Героя Украіны».

22 студзеня 2014 года падчас рэвалюцыі Годнасці й Свабоды Міхась Жызнеўскі быў забіты ў Кіеве на вуліцы Грушэўскага стрэлам у сэрца. Ён стаў адной з першых ахвяраў супрацьстаяння з сілавікамі Віктара Януковіча. Міхася прывезлі ў Беларусь і пахавалі на родавых могілках маці пад Гомелем.

Прэзідэнт Украіны пасмяротна ўзнагародзіў Міхася Жызнеўскага ордэнам Герояў Нябеснай Сотні. Бацькам прызначана пажыццёвая стыпендыя за загінулага сына.

Учора Ніна і Міхаіл Жызнеўскія ўзялі ўдзел у сустрэчы з кіраўніцтвам Украіны — прэзідэнтам Пятром Парашэнкам, прэм’ер-міністрам Уладзімірам Гройсманам, старшынём Вярхоўнай Рады Андрэем Парубіем ды генеральным пракурорам Юрыем Луцэнкам. У часе гэтай сустрэчы яны змаглі наўпрост звярнуцца да кіраўнікоў Украіны.

Пасля сустрэчы ўсе яе ўдзельнікі перамясціліся ў Міхайлаўскі сабор, дзе кіраўнік Украінскай праваслаўнай царквы Кіеўскага патрыярхату Філарэт правёў богаслужэнне ў памяць пра герояў Нябеснай сотні.