Андрэя Бандарэнку пачынаюць судзіць "за пыл на паліцы"

"Што значыць папярэдняе паседжанне, мне не патлумачылі. Магчыма, прызначаць сам суд, яшчэ нейкія судовыя фармальнасці выканаюць. Але судзіць Андрэя будуць у турме, і засудзяць, гэта ўжо з пэўнасцю магу сказаць", — мяркуе Валер Бандарэнка пра справу сына.

Цяпер Андрэю Бандарнэку інкрымінуюць 411 артыкул — гэта "злоснае непадпарадкаванне адміністрацыі папраўчай установы". Вязню пагражае да 3 гадоў зняволення. Паводле ранейшага прысуду за злоснае хуліганства, атрыманага амаль 3 гады таму, Бандарэнка мусіў выйсці на волю праз месяц, ў сакавіку 2017 года.

"Да яго чапляліся ўвесь час, то за пыл на паліцы, то нібыта, што ляжаў на ложку, калі можна было толькі сядзець. Гэтак назбіралі патрэбную колькасць парушэнняў, зрабілі "злосным парушальнікам рэжыму", перавялі ў турму, але і гэтага падалося мала, вырашылі яшчэ працягнуць яму зняволенне. Помсцяць за ранейшую ягоную дзейнасць як праваабаронцы", – мяркуе бацька вязня Валер Бандарэнка, паведамляе "Радыё Свабода".