У рэйтынгу Freedom House Беларусь засталася ў ліку несвабодных краін

Акрамя таго, да несвабодных краінаў залічаны Расія, Туркменістан, Таджыкістан, Узбекістан, Казахстан, Азербайджан, перадае Радыё Свабода. Анэксаваны Расіяй украінскі паўвостраў Крым, які пазначаны ў дакладзе праваабаронцаў як «спрэчная тэрыторыя», лічыцца таксама «несвабодным».

Усяго летась у 67 краінах назіралася пагаршэнне сітуацыі з палітычнымі правамі і грамадзянскімі свабодамі, і толькі ў 36 — паляпшэнне. На працягу апошніх 11 гадоў, зь 2006-га, у 109 краінах назіралася пагаршэнне сітуацыі, у 60 — паляпшэнне.

З 49 краін, прызнаных даследнікамі «несвабоднымі», 11 маюць найгоршы ўзровень палітычных правоў і грамадзянскіх свабод — Сірыя, Эрытрэя, Паўночная Карэя, Узбекістан, Паўднёвы Судан, Туркменістан, Самалі, Судан, Экватарыяльная Гвінея, Цэнтральная Афрыканская Рэспубліка і Саудаўская Аравія.

«Часткова свабоднымі» праваабаронцы лічаць Украіну, Грузію, Арменію, Кіргізстан і Малдову.

У дакладзе Freedom House адзначаецца, што галоўныя дэмакратычныя краіны адчуваюць трывогу і няўпэўненасць пасля таго, як Вялікабрытанія прагаласавала за выхад з ЭЗ, новы ўрад у Польшчы ўвёў шэраг антыдэмакратычных крокаў, у частцы Еўропы да ўлады прыйшлі ксенафобскія нацыяналістычныя партыі, а ў ЗША перамог Дональд Трамп.