Справу Андрэя Бандарэнкі перадалі ў суд

Бандарэнку вінавацяць па ч. 2 арт. 411 Крымінальнага кодэкса - “Злоснае непадпарадкаванне патрабаванням адміністрацыі папраўчай установы”, за што яму пагражае пазбаўленне волі на тэрмін да двух гадоў.

У пракуратуры справа, паведамляе spring96.org, разглядалася ўсяго адзін дзень – 17 студзеня. Пакуль невядома, якім чынам будзе праходзіць судовы працэсс. Верагодна, дата суда будзе прызначана бліжэй да сярэдзіны лютага.

У выпадку асуджэння Бандарэнкі па ч.2 арт. 411 КК РБ праваабаронцы будуць гатовыя прызнаць яго палітычным зняволеным.

Бандарэнка па-ранейшаму моцна абмежаваны ў перапісцы: ягоныя лісты не выходзяць за сцены турмы, таксама невядома ці атрымоўвае сам зняволены лісты, якія накіраваныя яму.

Андрэй Бандарэнка – былы кіраўнік праваабарончай арганізацыі "Платформ Іннавэйшн", якая займалася маніторынгам месцаў зняволення. У 2014 годзе яго прызналі вінаватым у хуліганстве, злосным хуліганстве і асабліва злосным хуліганстве ў дачыненні да трох грамадзян і асудзілі на 3 гады калоніі ўзмоцненага рэжыму.

Усяго на Бандарэнку накладзена больш за дзесятак спагнанняў у розных месцах пазбаўлення волі, дзе ён адбываў тэрмін. З-за гэтага ён прызнаны злосным парушальнікам рэжыму.

Цяперашні тэрмін зняволення Бандарэнкі заканчваецца 31 сакавіка 2017 года.