У Гомелі былога міліцыянта будуць судзіць за абразу беларускай мовы

Артыкул 9.22 КаАП -кваліфікуе публічную абразу, ганьбаванне дзяржаўных ды іншых нацыянальных моваў, стварэнне перашкодаў і абмежаванняў у карыстанні імі, прапаганду варожасці на моўнай глебе.

Васіль Варушчанка пакінуў каментар у суполцы парталу «Моцныя навіны» ў сацыяльнай сетцы «Ўкантакце» наступнага зместу: «Беларуская мова — гэта труп, што сапрэў і загнівае, які ўжо даўно трэба закапаць глыбей!». Цяпер яму пагражае штраф ад 4 да 10 базавых велічыняў, паведамляе "Радыё Свабода".

Ініцыятарам прыцягнення экс-міліцыянта да адміністрацыйнай адказнасці стаў гомельскі грамадскі актывіст, каардынатар кампаніі «Справаводства па-беларуску» Ігар Случак.

«У суд я не звяртаўся, — кажа Ігар Случак. — Я звярнуўся ў Гомельскі гарвыканкам, каб прыцягнуць да адказнасці гараджаніна, які абразіў нашу беларускую мову. А ўжо гарвыканкам распарадзіўся, каб на мой ліст рэагавала адміністрацыя Навабеліцкага раёну. Тыя падключылі міліцыю, арганізавалі лінгвістычную экспертызу. І калі эксперты зрабілі выснову, што ў каментары Варушчанкі ўтрымліваецца абраза беларускай мовы, то склалі адміністрацыйны пратакол і накіравалі ў суд».

Летась у верасні Случак дамогся пакарання штрафам у 4 базавыя велічыні жыхара Мазыра Дзмітрыя Шчарбатых. Той таксама абразліва выказаўся на адрас беларускай мовы ў сацыяльнай сетцы.

Адстойванне нацыянальных каштоўнасцяў, юрыдычныя адметнасці канфлікту актывісту Случаку цікавыя і з гледзішча падрыхтоўкі магістарскай дысертацыі на тэму «Праўныя асновы дзяржаўнай моўнай палітыкі ў Рэспубліцы Беларусі».

Атрымаў Случак таксама станоўчы адказ і з гомельскага ААТ «Мілкавіта» на прапанову не ўжываць пры маркаванні малочнай прадукцыі надпіс «из Белоруссии». Такой краіны «Белоруссия» няма, ёсьць «Беларусь». Тым ня менш да апошняга часу на пакетах малака пад гандлёвай маркай «Свитлогорье» акурат і пісалі «из Белоруссии».

Начальнік упраўленьня якасці Аляксандар Каваленка пісьмова паведаміў Случаку, што дызайн будзе зьменены. Прадукцыя ў Расію будзе адпраўляцца з пазнакай «Белорусские традиции».