Адміністрацыя «Белэкспа» просіць не зносіць комплекс у першым паўгоддзі 2017-га

Пра гэта БелаПАН паведаміў выканаўца абавязкаў намесніка дырэктара нацыянальнага выставачнага цэнтра «Белэкспа» Павел Якітовіч.

«Першае паўгоддзе вызначана як тэрмін зносу комплексу. Але мы просім адтэрмінаваць наш пераезд, бо ў гэты перыяд запланаваны шэраг вельмі важных міжнародных выставачных праектаў, якія вельмі складана перанесці цяпер. Таму мы просім і Мінгарвыканкам, і прадпрыемства «Мінская спадчына», каб мы маглі працаваць спакойна да мая», — паведаміў Якітовіч.

На пытанне аб выдзяленні новай пляцоўкі для размяшчэння выставачнага комплексу ён адказаў: «Перспектывы ёсць, але пакуль пра іх распавядаць вельмі рана. Трэба яшчэ месяц папрацаваць над прапановай. Тады мы будзем дакладна ведаць, ці пераязджаем мы на гэтую пляцоўку. З дапамогай Мінгарвыканкама і Упраўлення справамі прэзідэнта гэтае пытанне вырашаем. Ёсць адзін варыянт, але пакуль пра яго рана гаварыць».

Пра тое, што Мінгарвыканкам падпісаў інвестыцыйны дагавор па забудове тэрыторыі былой 2-й гарадской бальніцы з кампаніяй з ААЭ, паведаміў 21 снежня на прэс-канферэнцыі ў Мінску кіраўнік сталічнай адміністрацыі Андрэй Шорац.