У Брэсце затрыманы яшчэ адзін аўтар ганебных артыкулаў пра Беларусь

Як паведамляла "ЕўраБеларусь", стала вядома пра затрыманне аўтара расійскіх імперскіх сайтаў Юрыя Паўлаўца — выкладчыка Беларускага дзяржаўнага ўніверсітэта інфарматыкі і радыёэлектронікі. Як піша «Наша Ніва», затрыманы не толькі ён. У СІЗА трапіў яшчэ адзін аўтар сайта Рэгнум, вядомы пад псеўданімам «Ала Бронь». 

 Менавіта пад гэтым імем выйшаў матэрыял, дзе Беларусь называлася «звар'яцелай недадзяржавай», а беларускі акцэнт — «прыкметай нізкага паходжання». 

«Ала» была аўтарам і іншых абразлівых для Беларусі матэрыялаў. 

Па інфармацыі журналістаў, «Ала Бронь» — гэта 45-гадовы жыхар Брэста Дзмітрый Алімкін, колішні выпускнік Акадэміі кіравання пры прэзідэнце. 

Алімкін доўгія гады працаваў у «Белдзяржстраху». Апошнім часам быў вартаўніком у школе і пісаў артыкулы на расійскія сайты, змест тэкстаў каардынаваў з рэдактарам сайта «Імперыя» і шэф-рэдактарам Рэгнума Юрыем Баранчыкам. 

Як паведаміла жонка Алімкіна, яго затрымалі раніцай 6 снежня ў Брэсце. Затрымліваў АМАП, у хаце быў праведзены ператрус. 

Яго падазраюць у здзяйсненні злачынстваў па артыкуле 130 Крымінальнага кодэкса «Распальванне расавай, нацыянальнай або рэлігійнай варажнечы або розні». Алімкін знаходзіцца ў адным з СІЗА Мінска. 

Больш жонка паведаміць адмовілася, спаслаўшыся на падпіску пра неразгалошванне.