Статкевіч кліча на мітынг «з нагоды 20-годдзя антыканстытуцыйнага перавароту»

"20 гадоў таму ў беларускага народа ўкралі ўладу. Крадзёж здзейсніў чалавек, якому народ даверыў галоўную дзяржаўную пасаду", - напісаў Статкевіч у Фэйсбуку.

На думку палітыка, "у беларускага народа 20 гадоў таму забралі механізм пошуку паразумення паміж рознымі групамі грамадства. А такое паразуменне патрэбна не толькі паміж рознымі сацыяльнымі групамі - прадпрымальнікамі, рабочымі, службоўцамі, сялянамі, пенсіянерамі. Яно патрэбна і паміж людзьмі розных палітычных поглядаў".

Мікалай Статкевіч піша пра недзеяздольнасць беларускага парламента і прапануе "вярнуць сабе крадзенае" і навучыцца дамаўляцца паміж сабой.

"Геапалітычны выбар краіны не павінен вырашацца на плошчах - гэта справа паўнамоцнага парламента, абранага на сумленных выбарах. Каб не дапусціць грамадзянскіх канфліктаў, беларусам трэба вярнуць сабе такі парламент, вярнуць сабе ўкрадзеную 20 гадоў таму ўладу. Дыктатуры прыводзяць да войнаў", - падсумаваў былы палітвязень.

Палітык запрашае на мітынг, які мае адбыцца 24 лістапада ў 18.00 на плошчы Свабоды ў Мінску.