Пабачыў свет „Дыялектны слоўнік медыцынскіх тэрмінаў Беларусі”

Паўтысячы беларускіх словаў, якія змешчаны ў слоўніку, паказваюць, што сучасная медыцынская лексіка вычарпала далёка ня ўвесь мясцовы патэнцыял. Праца над слоўнікам вялася на працягу двух гадоў, паведамляе «Радыё Рацыя».

- У нас ёсць яшчэ адна крыніца запатрабаваная для папаўнення медыцынскай лексікі, - кажа Віктар Варанец. - Чым менш запазычанняў, тым мова лічыцца больш дасканалай і развітай. Па вялікім рахунку, у нас такія словы ёсць, і калі я іх збіраў, звярнуў увагу, што, скажам, некаторыя словы досыць шырока распаўсюджаны былі на Беларусі. Калі была развіта медыцына і карысталіся нейкімі нацыянальнымі тэрмінамі, значыць гэта мова мае свае вельмі-вельмі даўнія вытокі.

Дыялектны слоўнік можа дапамагчы маладым медыкам, якія накіроўваюцца ў розныя мясцовасці Беларусі, добра арыентавацца ў дыялектных тэрмінах, а таксама ўзбагаціць сваю мову.