7 лістапада каля будынка КДБ правацэнтрысты правядуць акцыю памяці

Мінгарвыканкам адмовіў у правядзенні ў Мінску 7 лістапада шэсця і мітынгу памяці ахвяраў камуністычнага рэжыму. Заяўнікі акцыі, лідары Правацэнтрысцкай кааліцыі паведамілі, што змяняюць фармат, але не адмаўляюцца ад яе правядзення, перадае Радыё Рацыя. Па словах сустаршыні Беларускай хрысціянскай дэмакратыі Віталя Рымашэўскага, ён, а таксама старшыня Аб’яднанай грамадзянскай партыі Анатоль Лябедзька і лідар Руху „За свабоду” Юрась Губарэвіч апоўдні 7 лістапада прыйдуць да будынку КДБ з партрэтамі ахвяраў палітычных рэпрэсій і запаляць знічкі:

– Таксама будзе там пэўны флэшмоб, у якім будзе прапанавана паўдзельнічаць усім мінакам. На гэты раз шэсце мы праводзіць не будзем, таму што падчас шэсця ў выніку адмовы па сутнасці на ўсіх удзельнікаў шэсця будуць складзеныя пратаколы. Мы ведаем, чым гэта заканчваецца – гэта штрафы. Дзеля таго, каб не падстаўляць людзей, мы не заклікаем прыходзіць на гэтую акцыю, але мы там будзем. І мы перакананыя, што да нас далучацца іншыя.

Таксама, як паведамляла "ЕўраБеларусь", 7 лістапада адбудзецца бясплатная экскурсія па Курапатах “Беларуская Галгофа”. Усіх ахвотных далучыцца да імпрэзы запрашаюць сустрэцца ў 15.00 ля Крыжа Пакут, усталяванага ва ўрочышчы на месцы пахавання ахвяраў сталінскіх рэпрэсій. 

У той жа дзень у 18.00  гадзіне ў зале ўправы БНФ (вул. Чарнышэўскага, 3) адбудзецца прэзентацыя дакументальнага фільма “Суд над камунізмам. Пачатак”, знятага рэжысёрам Віктарам Корзунам. Пасля прагляду фільма адбудзецца дыскусія на тэму “Наступствы камуністычных рэпрэсіяў у Беларусі", у якой прымуць удзел гісторыкі, палітыкі, грамадскія дзеячы.

Таксама адбудецца канцэрт з удзелам Касі Камоцкай і Аляксея Галіча.