Вандалы апаганілі «Гомельскія Курапаты»

Пенсіянер Міністэрства ўнутраных справаў Уладзімір Няпомняшчых сведчыць, што раней на гэтым месцы не было ямы.

- Відавочна, што на гэтым месцы працаваў экскаватар, - сказаў ён «Радыё Рацыя». - Трэба звярнуць увагу на тое, што нідзе не засталося слядоў вынятага грунту. Магчыма яго ўзялі, каб дзесьці спакойна перабраць зямлю на прадмет наяўнасці каштоўных рэчаў. Я думаю, што міліцыя можа прыехаць сюды, але сумняюся, што яны кагосьці сур’ёзна будуць шукаць.

Аўтар дакументальнага фільма „Лінія Сталіна. Гомельскі рэгіён” Кастусь Жукоўскі мяркуе, што акт вандалізма маглі здзейсніць „чорныя археолагі”.

– Гэта не могуць быць будаўнікі, бо тут не пясок, а грунт. Мяркую, што тут маглі папрацаваць так званыя чорныя капальшчыкі. Хапае ж у нас манкуртаў. Я сёння планую напісаць заяву ў міліцыю, каб яны заняліся справай. А то Змітра Дашкевіча яны хутка затрымліваюць пад Веткай у лесе, а тут не бачаць, што бязмежжа пад самым носам адбываецца.

Шчакатоўскі лес – месца масавых расстрэлаў пад Гомелем. Паводле сведчанняў мясцовых жыхароў з навакольных вёсак і мястэчак, у 1937 годзе супрацоўнікі НКУС расстрэльвалі тут так званых ворагаў народу. У 2007 годзе ў Шчакатоўскім лесе былі знойдзеныя парэшткі забітых у 1930-я гады людзей. Раскопкамі займаўся 52-гі спецыялізаваны пошукавы батальён Мінабароны РБ, спецыялісты якога потым абвясцілі, што ў лесе пахаваныя ахвяры нацыстаў.