На Слонімшчыне збіраюць грошы на канал Агінскага.

Некамерцыйнае грамадскае аб’яднанне “СлонімКаналАгінскага” ставіць сваёй мэтай аказанне дапамогі ў рэканструкцыі, добраўпарадкаванні і зберажэнні канала Агінскага і яго набярэжнай у межах горада Слоніма. А таксама – адраджэнне культуры, гісторыі і традыцый Слонімшчыны. Сябрамі ГА “СлонімКаналАгінскага” могуць з’яўляцца грамадзяне, якія дасягнулі 16-гадовага ўзросту і жывуць на тэрыторыі Беларусі ці ў іншых краінах свету.

Сёння гэта грамадскае аб’яднанне ўжо налічвае каля 40 чалавек, паведамляе «Радыё Рацыя».

Акрамя добраўпарадкаваннне самога канала Агінскага, сябры НГА плануюць і ўжо праводзяць розныя мерапрыемствы, звязаныя з культурай, краязнаўствам і гісторыяй, наладжваюць сувязі з рознымі партнёрамі, арганізоўваюць валанцёрскую працу, творчыя сустрэчы.

На рахунак ГА “СлонімКаналАгінскага” ужо паступілі першыя ахваряванні. 300 беларускіх рублёў пералічыў былы слонімец, а цяпер жыхар Ізраіля Міхаіл Белкін, былая настаўніца гісторыі Алена Лябецкая ахвяравала са сваёй пенсіі 30 рублёў, сям’я Жолудзяў са Слоніма пералічыла 40 рублёў, былы дырэктар слонімскай гандлёвай фірмы “Світанак” Васіль Духоўнік – 50 рублёў, пенсіянеркі Марыя Сяргеева і Галіна Сазонкіна са Слоніма – па 20 рублёў і г.д.