БДУ спыніў супрацоўніцтва з рыэлтарам, які абразіў народнага паэта Барадуліна

"Гэта праўда. Але, ведаеце, я ўжо стаміўся ад гэтай сітуацыі і не жадаю больш даваць каментары на гэтую тэму", — сказаў Гарашчэня ў каментары Еўрарадыё. Паводле яго слоў, пра прычыны спынення супрацоўніцтва ў БДУ нічога не паведамілі.

Аляксандр Гарашчэня абразіў Рыгора Барадуліна, калі назваў у сацсетцы "нацысцкай сволаччу" з-за таго, што той быў чальцом Партыі БНФ. Гэта выклікала хвалю абурэння, з асуджэннем такога ўчынку выступілі прадстаўнікі Белдзяржуніверсітэта.

Таксама Гарашчэня паведаміў журналістам, што больш не працуе ў агенцтве «АкадэмНерухомасць». Праўда, на сайце агенцтва ён усё яшчэ значыцца ў якасці атэставанага рыэлтара.

«Зразумела, што гэта быў учынак, якім ганарыцца ніяк нельга. Трэба было, калі і пісаць, то абыходзіцца без нейкіх брыдкіх выразаў. Але што зроблена, тое зроблена», — пракаментаваў свае допісы герой скандала.