У Віцебску паабяцалі прыпыніць будаўніцтва Сафійскага сабора

Абласная кіраўніца Беларускай хрысціянскай дэмакратыі Таццяна Севярынец – сярод ініцыятараў гэтага змагання.

«Першую перамогу нібыта мы атрымалі, – паведаміла «Радыё Рацыя» грамадская актывістка. – На нядаўняй сустрэчы з прадстаўнікамі гарвыканкама намеснік галоўнага архітэктара Віцебска Леанід Багданаў паведаміў, што будаўніцтва сабора прыпынена. На сустрэчы ніхто дакладна не мог адказаць на пытанні людзей. І тут Багданаў зразумеў, каб людзі супакоіліся, трэба сказаць, што будаўніцтва прыпынена пакуль не знойдзецца кансэнсус паміж ініцыятарамі будаўніцтва з мясцовай епархіі і жыхарамі. Карацей, будуць яны шукаць нейкую згоду».

Леанід Багданаў таксама паабяцаў арганізаваць наступную сустрэчу для абмеркавання гэтага пытання ў памяшканні з мікрафонамі, каб было добра чуваць выступоўцаў. Людзі ж вырашылі не спыняцца і збірацца па панядзелках каля помніка Уладзіміру Караткевічу, каб раіцца і вырашаць, як адстаяць парк.