Эдуарда Пальчыса перавялі на «Валадарку»

Пра гэта паведамілі брату Эдуарда, які хацеў аддаць перадачу зняволенаму ў турме Жодзіна.

Пальчысу шмат лістуюць, таму важна, каб людзі пісалі ўжо на новую адрэсу, кажа Свабодзе Вікторыя Пальчыс, жонка Эдуарда. Лісты ў адказ піша і сам зняволены: учора яна атрымала адразу тры лісты, апошні за 18 верасня. У лістах ён не скардзіцца на абыходжанне і харчаванне, не губляе пазітыўнага настрою, кажа Вікторыя.

Адвакатка Пальчыса Ганна Бахціна бачыла яго апошні раз у панядзелак, 26 верасня, абмяркоўвала падрыхтоўку да суда. Яна казала, што Эдуард выглядае добра, але схуднеў.

«Я ніколі не хацеў быць палітзняволеным», — перадае адвакат словы Пальчыса з СІЗА

Працэс над Эдуардам Пальчысам мае пачацца 14 кастрычніка. Заснавальніка і аўтара сайта 1863x.com, вядомага пад нікнэймам Jhon Silver, абвінавачваюць у «распальванні расавай, нацыянальнай ці рэлігійнай варожасці або розні» (ч.1 арт. 130 Крымінальнага кодэксу) і «распаўсюдзе парнаграфічных матэрыялаў» (ч.2 арт. 343). За «распальванне варожасці» Пальчысу пагражае арышт на тэрмін да шасці месяцаў ці абмежаванне волі на тэрмін да пяці гадоў, а за «распаўсюд парнаграфіі» — пазбаўленне волі на тэрмін ад 2 да 4 гадоў.

Пальчыс лічыць, што суд Цэнтральнага раёна прыняў сваё рашэнне пра прызнанне артыкулаў экстрэмісцкімі без даследавання саміх артыкулаў і накіраваў скаргу ў Мінскі гарадскі суд.

Тым часам сайт 1863x «ажыў», на ім працягваюць публікавацца запісы, падобныя да ранейшых.