Грамадзянскія актывісты змагаюцца з незаконнай рэканструкцыяй у гістарычным цэнтры Воршы

Цэнтральная пажарная частка Воршы доўга знаходзілася ў гістарычным цэнтры горада, на Замчышчы. Нечакана ў сярэдзіне верасня, літаральна за дзень,“пажарка” была абнесеная бетонным плотам і пачалося руйнаванне будынка, узведзенага да ІІ Сусветнай вайны. Усё гэта пачало адбывацца без узгаднення са спецыялістамі ў галіне археалогіі, паведамляе «Радыё Рацыя». Хаця менавіта там, на думку гісторыкаў, могуць знаходзіцца рэшткі Аршанскага замку, які абараняў старажытны горад з канца XIV стагоддзя, а ў XVII, пасля некалькіх узяццяў чужынскім войскам падчас вайны Рэчы Паспалітай з Расеяй (1654-1667), страціў свае функцыі, прыйшоў у заняпад і не дажыў да нашых гадоў.

На незаконнасць работ і адсутнасць якіх-небудзь грамадскіх слуханняў з першага дня звярнулі ўвагу жыхары горада.

На месцы так званай рэканструкцыі карэспандэнт «Радыё Рацыя» пабачыў некалькі грузавых аўтамашын, якія вывозілі зруйнаваныя сцены старога будынку. То бок, фактычна, пачалася не рэканструкцыя, а перабудова, а ад старога будынку, верагодна, нічога не застанецца.

Пажарныя машыны, якія раней стаялі тут, часова размеркаваныя па іншых гаражах і працягваюць выконваць свае функцыі.

Розгалас, які ўзняўся пасля пачатку нечаканых работ, прымусіў кіраўнікоў мясцовага МНС аператыўна, ужо ў час актыўнай фазы праекту, звярнуцца ў Інстытут гісторыі Акадэміі навук і ўзгадніць рэканструкцыю з археолагамі, як таго і патрабавала заканадаўства. У выніку, як удалося даведацца, праект узгоднены і пастаўлены на кантроль – з Менску ў Воршу прыбыла спецыяліст-археолаг, якая будзе адсочваць усе работы на аб’екце. Ёсць надзея, што ў бліжэйшы час на плоце з’явіцца і “пашпарт аб’екта”, пакуль жа на браме адсутнічаюць любыя пазнакі аб тым, што адбываецца ў раёне Аршанскага Замчышча.