У Мінску збіраюць рэчы для чачэнскіх уцекачоў

Спробы прыехаць у Польшчу і атрымаць статус уцекача блакуюць польскія памежнікі, паведамляе «Радыё Рацыя». Замежнікі вымушаныя пакуль шукаць прытулку ў Берасці.

«Некаторым сем’ям даводзіцца начаваць на вакзале, таму амаль усе дзеці хварэюць, з высокай тэмпературай», – распавёў праваабаронца Раман Кісляк.

– Гэта такі збор рэчаў для ўцекачоў, бо стала вельмі халодна, некаторыя жывуць на вакзале, хварэюць. Яны прыехалі летам, у іх няма цёплых рэчаў для такога надвор’я. Хлопцы пачалі такую акцыю. Людзі ўцякаюць у асноўным з Чачні, а таксама Дагестана, Інгушэціі, Таджыкістана. Людзі ўцякаюць ад свавольства ўладаў, а польскія памежнікі таксама свавольнічаюць. Фактычна ўсталявалі фільтр, які абсалютна незаконны – не дапускаюць людзей да працэдуры атрымання прытулку.

Падчас акцыі будзе праводзіцца збор цёплых дзіцячых рэчаў, патрэбныя курткі, коўдры, пледы, спальнікі, вельмі патрэбныя таксама памперсы ды жаночае адзенне, паведамляе дабрачынная суполка Human Constanta у Facebook.