Два акопы Дашкевіча суд ацаніў у 110 долараў

З яго патрабуюць заплаціць 220 рублёў 50 капеек "новымі" (гэта каля 110 долараў), паведамляе сайт арганізацыі.

Гэтыя грошы веткаўскія ляснічыя патрабуюць за два акопы, выкапаныя 6 верасня. Тады Дашкевіч разам з Сяргеем Пальчэўскім зладзілі перфоманс недалёка ад расійскай мяжы, каб адзначыць 19-ю гадавіну заснавання арганізацыі.

Двух маладафронтаўцаў затрымлівалі міліцыя, пажарныя, супрацоўнікі КДБ. А для перакладу тлумачэнняў былі знятыя з урокаў дзве настаўніцы беларускай мовы.

Дашкевіч звяртае ўвагу, што ні разу такія штрафы не выпісваліся ні на адным з вайсковых збораў, "якія праводзяць прарасійскія актывісты пад патранажам казацтва і маскоўскага праваслаўя".