Памёр прафесар Юрый Хадыка

Памёр прафесар, доктар фізыка-матэматычных навук Юрый Віктаравіч Хадыка. Яму было 78 гадоў, паведамляе "Наша Ніва".

«Бацькі з намі больш няма», — напісаў у фэйсбуку яго сын Канстанцін, які і паведаміў сумную вестку. Юрый Хадыка апошні час жыў у сына ў штаце Каларада (ЗША).

Юрый Віктаравіч Хадыка нарадзіўся ў Мінску 23 чэрвеня 1938 г.

Зрабіў кар'еру ў фізіцы, узначальваў секцыю аптычна-электронных сродкаў разведкі ў камісіі АН СССР па распрацоўцы прагнозу развіцця ўзбраенняў, абараніў доктарскую «Аптычныя характарыстыкі факелаў балістычных ракет», аўтар каля 150 навуковых прац па фізіцы.

Юрый Віктаравіч таксама прымаў удзел у зборы матэрыялаў (экспедыцыі) і напісанні «Зводу помнікаў гісторыі і культуры Беларусі», у 1979 адкрыў пры АН БССР Музей старажытнабеларускай культуры.

Далучыўся да руху беларускага адраджэння. З 1988 — намеснік старшыні БНФ (быў да снежня 2007).

У 1996 г., пасля сканчэння масавага Чарнобыльскага шляху, сп. Хадыка разам з Вячаславам Сіўчыкам 26 красавіка быў арыштаваны і кінуты ў турму, яго абвінавацілі ў арганізацыі масавых беспарадкаў. У знак пратэсту абвясціў галадоўку. 21 мая быў вызвалены.

Журналіст Сяргей Абламейка некалі пісаў у сваім фэйсбуку з нагоды юбілею сп. Хадыкі:

«Гэты фізік — адзін з найлепшых у Беларусі знаўцаў царкоўнага жывапісу: абразоў і роспісаў.

Хадыка — аўтар канцэпцыі, паводле якой у другой палове 18 ст. беларускі царкоўны жывапіс (уніяцкі) сінтэтычна злучыў праваслаўныя і каталіцкія традыцыі і дасягнуў стадыі ўласнай канонатворчасці. І гэта датычыцца не толькі жывапісу, але і ўсяго мастацтва Уніі — архітэктуры, скульптуры і г.д.».

З 1988 г. — намеснік старшыні Беларускага народнага фронту (да 2007-га), у 1997—2000 уваходзіў у назіральную раду БХК, быў прарэктарам Народнага ўніверсітэта.