Магілёўская чыгунка: У нас усё будзе на беларускай мове

Супрацоўнікі чыгункі кажуць, што кіраўніцтва выдала адпаведны ўказ, паведамляе Радыё Свабода.

У Магілёўскім аддзяленні Беларускай чыгункі давялі: існуе «ўказ начальніка дарогі, каб абвесткі агучвалі на беларускай мове».

«Цяпер мы паволі пераходзім на беларускую мову. Пакуль не ўсе аддзяленні чыгункі перапісалі лакаматыўную інфармацыю на беларускую мову, таму ў розных месцах абвесткі перадаюць яшчэ на расейскай. Пасажыры раяць прыйсці да нейкай адной мовы. Згодна з указам у цягніках мусіць гучаць беларуская мова. Зваротаў з пратэстамі супраць беларусізацыі не паступала», — зазначыў супрацоўнік пасажырскага аддзела Магілёўскага аддзялення чыгункі.

На чыгуначным вакзале Магілёва абвесткі дублююць па-беларуску і па-расейску. Іншую інфармацыю для пасажыраў агучваюць на расейскай мове. На табло расклад руху цягнікоў расейскамоўны, толькі назвы раздзелаў пададзеныя па-беларуску. Таксама па-беларуску — некаторыя абвесткі, напрыклад, пра дазволеныя месцы курэння.

«Так, мы разумеем, што існуюць неадпаведнасці, але розныя групы з дакументамі разбіраюцца. Паволі будзем ісці да адной мовы — беларускай. Адпаведная праца вядзецца. Будзе ў нас усё на беларускай мове», — запэўніў супрацоўнік пасажырскага аддзела.