Эдуарда Пальчыса могуць прызнаць палітвязнем

Пра гэта карэспандэнту Свабоды сказалі ў прэс-службе Вярхоўнага суда Беларусі. Дзень пачатка працэсу яшчэ не прызначаны, сказалі ў Мінскім гарадскім судзе.

Праваабаронцы працягваюць уважліва сачыць за справай Эдуарда Пальчыса, якую лічаць палітычна матываванай. Юрыстка праваабарончага цэнтру «Вясна» Наста Лойка не выключае, што Эдуарда Пальчыса прызнаюць палітвязнем:

«25 жніўня „судзілі“ матэрыялы з сайта 1863х.com, які вёў Эдуард Пальчыс. А працэс над самім блогерам можа пачацца хоць праз 10 дзён, а можа — і больш як праз месяц. Закон гэта дазваляе. Справа „Джона Сільвера“ ўяўляе вялікі грамадскі інтарэс, і ўжо відавочна, што яна мае яўныя палітычныя прычыны. Гэта пацвердзіў і суд над матэрыяламі сайта, які ў закрытым рэжыме прызнаў 9 артыкулаў экстрэмісцкімі. Гэтае рашэнне адвакат Пальчыса абскардзіць. Але варта адзначыць, што гэтак робіцца база для будучага суда над самім блогерам».

Ці прызнаюць Пальчыса палітвязнем, калі яго асудзяць за распаўсюд матэрыялаў, прызнаных экстрэмісцкімі? Гэта будзе залежаць ад розных акалічнасцяў.

«У тым ліку ад інфармацыі па справе, якой пакуль недастаткова. Але шмат залежыць і ад таго, ці будзе працэс адкрыты, ці яго таксама закрыюць, фармальна спаслаўшыся на таямніцу. Будзем глядзець і экспертызы па справе Пальчыса, наколькі яны будуць адкрытыя і аб’ектыўныя», — сказала Наста Лойка.

Эдуарда Пальчыса абвінавачваюць у «распальванні расавай, нацыянальнай ці рэлігійнай варожасці або розні» (ч.1 арт. 130 Крымінальнага кодэксу) і «распаўсюдзе парнаграфічных матэрыялаў» (ч.2 арт. 343). За «распальванне варожасці» Пальчысу пагражае арышт на тэрмін да шасьці месяцаў ці абмежаванне волі на тэрмін да пяці гадоў, а за «распаўсюд парнаграфіі» — пазбаўленне волі на тэрмін ад 2 да 4 гадоў.

Паводле праваабаронцы, Эдуарда Пальчыса ўтрымліваюць у следчым ізалятары ў Жодзіне.

«Ён не разгубіўся, захоўвае баявы дух і трымаецца, хаця ўмовы там даволі жорсткія і на яго ўвесь час чыніцца ціск. За 7 месяцаў, што Пальчыса ўтрымліваюць пад вартай, яму ніводнага разу не дазволілі сустрэцца з жонкай, і толькі раз ён змог пабачыць маці. Але, мяркуючы па лістах ад яго, ліставацца ўсё ж дазваляюць», — сказала Наста Лойка.

Абараняць Эдуарда Пальчыса ў судзе збіраецца адвакатка Ганна Бахціна.

Блогер Эдуард Пальчыс, вядомы ў інтэрнэце пад імем «Джон Сільвер», змяшчаў на сайце 1863х.com, сярод іншага, матэрыялы, у якіх даваліся крытычныя ацэнкі палітыцы Расіі адносна Беларусі і Украіны. На пачатку года Эдуард Пальчыс быў арыштаваны ў Расіі і выдадзены Беларусі.