У Берасці ўшануюць памяць Алеся Чаркашына

Вядома, што на вечар памяці будуць запрашаць сваякоў і блізкае кола сяброў, але не публічна, паведамляе "Радыё Рацыя". Кажа паплечнік і сябра Чаркашына Андрусь Любянчук:

– Збіраем у гэты дзень самых блізкіх людзей. З помнікам вырашылі пачакаць, каб дапрацаваць праект, дарабіць усе дэталі. Асноўная частка помніка гатова, але крыху не хапае фінансаў. Таму ўсталяваць вырашылі пазней – на ягоны дзень народзінаў.

Алесь Чаркашын памёр год таму 28-га жніўня пасля таго, як атрымаў раненні падчас аднаго з баёў. Баец з пазыўным "Тарас" стаў першым загінулым сярод беларусаў, што ваююць за незалежнасць Украіны.

Бацькі прынялі рашэнне аб перавозцы цела байца Правага Сектару на радзіму ў Берасце. Дзясяткі людзей з Беларусі і іншых краінаў тады адгукнуліся і фінансава дапамаглі ў арганізацыі пахавання.