У Белаазёрску ліквідуюць фабрыку спартовага абутку «Белкельме»

Але віцебская кампанія «Марко» стварае прадпрыемства «Вэрдымар», якое мусіць працаўладкаваць былых працаўнікоў белаазёрскай фабрыкі.

Як апавялі Свабодзе былыя працаўніцы «Белкельме», крызіс на прадпрыемстве ўжо даўно — часам на складах назапашваецца да 800% ад сярэднемясячнага абʼёму вытворчасці.

Працаўнікоў з «Белкельме» звальняюць, але абяцаюць працаўладкаваць у «Вэрдымар»

«Праблемы пачаліся яшчэ з 2015 года. А апошнім часам я ўвогуле практычна не працавала — 2 дні на месяц, 3 дні, самае большае — 4 дні... 800 тысяч рублёў атрымлівала, 600 тысяч... Так і жывеш — камунальныя плаціла, ды ўсё», — сказала працаўніца з Белаазёрску.

Яна дадала, што з фабрыкі ўжо звольнілі сотні чалавек, але ўсіх павінна працаўладкаваць «маркаўская» фірма «Вэрдымар».

«Сказалі, што ўсіх на тыя ж пасады возьмуць, нават дабіраць будуць людзей. Абяцалі, што перастаноўкі будуць толькі ў адміністрацыі, бо там столькі не трэба людзей. Сказалі, што да Новага году будуць праблемы — пакуль усё супакоіцца. Але абяцаюць, што працы будзе шмат», — распавяла пра перспектывы спадарыня.

Пра тое, што беларуска-іспанскі вытворца спартовага абутку ўвойдзе ў холдынг "Марко", яшчэ год таму казаў гендырэктар апошняга Мікалай Мартынаў.