Чытачы не дазволілі закрыць бібліятэку ў Баранавічах

Пасля пісьмовага пратэсту 118 чытачоў, гарадскі выканаўчы камітэт паабяцаў ў 2016 годзе ўстанову не закрываць.

Тым не менш адна з супрацоўніц бібліятэкі Алена Камарова ўжо папярэджана аб яе скарачэнні, паведамляе «Радыё Рацыя». «Застанецца толькі дзве адзінкі – загадчыца і бібліятэкар, якім патрэбен будзе адпачынак, яны могуць хварэць, а чытачоў больш за паўтары тысячы, то бок яны будуць не ў стане нармальна працаваць», – кажа Алена Камарова.

– Яны лічаць, што дзеці не чытаюць, што не трэба людзям, яны зараз усе ў інтэрнэце, яны зараз усе з планшэтамі.

РР: А ці гэта праўда?

– Не. Дзеці ідуць за кнігай, дзецям патрэбная кніга. Я не кажу пра людзей дарослых, тых хто любіць чытаць, пра пенсіянераў, якія да нас таксама ходзяць. А ў музычную школу гэтую ездзяць дзеці з усяго горада. І з тых раёнаў, дзе няма бібліятэкі.

«Тры мільёны, якія атрымлівае Камарова, дзіркі ў бюджэце не залатаюць. Калі каго скарачаць, то непатрэбную армію ідэолагаў», – кажа аранізатар звароту, грамадская актывістка Таццяна Малашчанка, маці адной з дзвюх вучаніц беларускамоўнага класа.